BAZAAR TIPS

BAZAAR TIPS

Israel gam kumkhat val kaumtan, hetding’a lomjouse kahejoupoi. Gamneocha tia noise ding vang ahibehseh poi. Niseh leh athahbeh kihebe jingjeng thei ahi. Hetding kiti hi achaina aumpoi.Thil umdan hojouse hi, abangkha hohi ahahsalamtah’a kahetdoh ngen ahin, atamjo vang min eiseipeh akuon’a kahet ngen chuleh kadohthu a kahet jong atam’e.

Thil kijoh jouse hi Hebrew pao in akijihsuoh keiyin, english’a kijih alhome.

Thil kijoh jouse hi expiry date aumsoh keiyin, adeh’a bongnoi leh bread (lekhem) hohi expiry date hoitah’a vet angaiye, hiche hohi akichaivah in ahi.

Israel gama Dustbin (Trash can) hi Litre ijat dol ham, ti dunjuiyin akicho in, asung’a thap ding plastic bag hohi centimeter in akicho in ahi.

Israel gamsung’a mun atamjo’a hin insung’a nehding thil ho (Grocery) ichoh teng, Delivery Option (inn’a amahon eithahpeh theinau lampi) aumin ahi. Abangkhat chun sum alauvin, atampen’a shekel 10 to 25 ahijin ahi, abangkhat chun athahman free ahi. Adeh in Kiryat Arba lang’a thil shekel 100 manval nachoh’a ahileh free a nathah peh diu ahi.



Grocery store neoho’a hin thil akimpoi, hinlah SHUK (Market) lien ho a vang insung’a manchah ding’a idei jouse alhingsuoh keiye. Vetsah na in, Makhane Yehuda shuk (Jerushalem) muna khun imajouse akimusoh keiyin, mundang’a namulou thilho jong hilai muna hi bailam tah’a namuthei ahin, thilman jong alhome. Hilai muna hi bong-sasung, savun, amit etc. ho namuding ahi.

Bongnoiya kisiem ho nachoh teng, thao ijat jaovem tin fat percentage ho akijihsoh keiye.

Sa (Bongsa) nachoh teng, atum-tumin aumin, a number dungjuiya kicho ahi. Tekah nan, amalphe hi number 6 ahin, amanjong atamin, adah-phe number 8 ahin, hitobang chun bongsa kijohna jouse’ah, bong lim toh number aumsoh keiyin, het ahahsapon ahi. Ice lah’a kikoi bongsa ho sangin, ahunglhungthah ice a kikoiloulai ho aman atamjep’e.

Ahsa hi apum’a jong nachoh thei ahi. Hinlah apum hilouva, achuombeh’a nadudeu, tichu, ah-kang, amalphe, alha, alol-gu, ah-thin, tiho nadu jongleh achuombeh in akijoh kit in ahi.

Alhangpia Israel gamsung’a thil kimanna pen hi RAMY LEVY te ahiuve. Ramy Levy kiti hi super-market min ahin, israel gamsung muntin’a Dukan-lien anei u ahi. Hapta khat sung’a thil kiman nipen tijong aumkit in, tekah nan Ramy Levy te hin Thursday niseh leh kimantah in thil ajohjiuve.

Hitobang’a thil kijohna mun hi atama tam ahin, hinlah alhangpia thil umdan hi akibang suoh keiye.
Alhangpia thil mantanna mun chu ahileh : Mega Ba’lr, Shufersal Sheli
Thil kimanjepna : Mega, Shufersal Big, Mr. Zol
Thil Kimanna : Mega Bool, Shufersal Deal
Akimanna pen chu : Kharedi ho chenna muna um Yesh, Shefa Shuk, kiti ho ahi.
Atamjo a thil kimanna pen vang chu ahileh Ramy Levy te ahiuve.

Dukan-lien neijouse hin, amaho dukan’a thil choh nopjep nading leh discount umtheina dingin, a customer hohi CARD asiempieh kit un ahi. Hiche ho nakisiem’a naneiya ahileh, thil atamjo a discount namuding ahikite. Hiche jeh’a hi, thil nachoh’a sum napieh kiguot teng, “Kartis-Mo’adon” nanei em, tin nahindong masapen inte.

Thil nachohpet’a sum naneilouva ahileh, na bank card napieh’a, lhakit teng amahon sum anakilah diuva naseithei ahi. Hiche hi hebrew pao ah “Tashlum/im” akitin

Hichena ding’a hi na bank te koma, hitobang’a sum nanei louteng, ahilouleh na bank bank balang chu zero ahiteng, sum ijat hamkhat nakilahdoh theikit nading’a nakiseithei ahi.

Israel gama hin thil tena hi india a toh akibang in, Kilogram amang uvin ahi.

Lekhabu nachoh noma ahileh, book store a nache ngai ahi. English lekhabu hi amuhah in ahi.

Thilcho’a nache’a Car/gari natolteng, parking naholmo maithei ahi. Israel’a parking law hi akhoudehset in ahi. Lampam’a nakingah teng vele-le lechun automatic’a sumpehna ding mun (Kiosk) umding, hilaiya chu ticket nakilah ding, nahungpot doh dingkuon teng sum napieh’a potdohnathei ticket nakilah ding ahi. Lampam’a parking nabolteng, Kiosk tobang umkit nalai ahi, alhompen’a 10 shekel napeh’a pungkal 1 nakingah thei ahi, pungkal chu anakichaitah’a ahileh POLICE koma hijeng ahi. Hijeh’a hi aphapen chu ahileh, EASY PARK kiti electronic device khat aumin, hiche hi Post Office ah kijoh intin, nakicho’a, amaho koma sum napieh masat teng, car parking mun’a chu sumpieh ngailou chuleh boina umlouva nakingah jengthei ahi. Hiche sang’a hoijo khat aum kit in, Pango akitin http://english.4500.co.il, hiche hi Phone akuona sum napiehtheina ahi.

Israel gama english cinema hohi atamjo Hebrew’a kiledoh suohkei ahi.

Israel gama nikho-kum-le-lha kijih dan hi European style ajui un : Day/Month/year. India a toh kibang ahi.

Tehse kumtam, pasal kum 60 apat chunglam holeh numei kum 65 apat chunglam sese hi Egged bus a bhara jat akehkhat alahjiu ahi.

Israel gam hi gamthieng ahitoh kilhon in agamsung jong athieng in, nehthei naneh’a abom mohpaimang kiti aumpoi. Apaina ding mun Dustbin hi lampam jouse’ah aumsoh keiyin, nehthei naneh’a dustbin agamlat leh, nasakhao’a nakuo a dustbin umna mun naphah teng napai ding angaiye.

Inn lang bang’a dammo phat leh inop nop’a damdoi choh thei ahipoi. Achohna ding mun jong aumpoi. Doctor pun lekha nasutpeh louleh, pharmacy te akuona lou chohdoh ding vang kinem hih in. Hiche chung chuona chun dammo teng hospital a naum a ahileh sum angaipoi. Dammo chungchang hi Israel ten akhohsah un ahi.

Israel’a english Newspaper hetthei domho chu ahileh Jerushalem Post, Haaretz ahi, aman atamin niseh’a copy khat’a shekel 15 or 19 hijeng ahi. Hebrew newspaper ho vang aman alhomin, manbeiya kimujong aume.